Փաստաբանների հետապնդումներ

148.JPG

Փաստաբաններն ակնկալել են, որ  պետական մարմինների հետապնդումներից ազատվելուց հետո դրանք  շարունակություն չեն ունենա, բայց Փաստաբանների պալատի գործողություններով դրանք զարգացում ապրեցին, եւ հիմա  փաստաբանները թեւակոխել են նոր՝ իրենց պաշտպանելու փուլ։

    «Եթե նախկինում  գործողությունները միտված էին մեր վստահորդների,  պաշտպանյալների իրավունքները պաշտպանելու, օրինականությունն ապահովվելու ուղղությամբ,   որը մեզ համար հետեւանքներ էր ունենում,  հիմա մեր իրավունքների պաշտպանության գործերով ենք զբաղված։  Չենք տեսնում այն լույսը,  որի  հետեւից մենք գնում ենք։ Հասկանում ենք, որ դեռ երկար ճանապարհ ունենք անցնելու»,- «Հելսինկյան ասոցիացիա» իրավապաշտպան հասարակական կազմակերպության կողմից հրավիրված «Փաստաբանների իրավունքների ջատագովություն» թեմայով երկրորդ կլոր սեղան հանդիպման ժամանակ մասնավորապես նշեց փաստաբան Արայիկ Պապիկյանը։

Հանդիպման ընթացքում քննարկվեցին փաստաբանների նկատմամբ դատական սանկցիաների կիրառմամբ կարգապահական հետապնդումների խնդիրը, փաստաբանների մասնագիտական գործունեության խոչընդոտման ներկա իրավիճակը։ 

  2017-2019թթ. ընթացքում Հելսինկյան ասոցիացայի փաստաբանների նկատմամբ հարուցվել է շուրջ 30 կարգապահական վարույթ, որոնցից 20-ի դեպքում նրանք ենթարկվել են կարգապահական տույժի։ Այս վարույթները հարուցվել են քաղաքական աղմկահարույց՝ «Սասնա ծռեր»-ի եւ «Ժիրայր Սեֆիլյանի եւ մյուսների» գործերով պաշտպանություն իրականացնելու ընթացքում։ Սրանք առավելապես եղել են «անհնազանդ» փաստաբանների նկատմամբ հետապնդումների յուրօրինակ դրսեւորումներ։

   Արայիկ Պապիկյանը շեշտում է՝  ՓՊ-ն իր որոշման մեջ այնպիսի հիմնավորումներ է նշում, որոնք ավելի վիրավորական են, քան բուն կարգապահական տույժի ենթարկելը։ Նա որպես մեջբերում նշում է․

 «Օրինակ, փաստաբանը գիտակցել է իր արարքի ոչ իրավաչափ լինելը եւ կանխամտածված թույլ է տվել, որ այդպիսի ոչ իրավաչափ փաստ տեղի ունենա։ Սա, կարծում եմ, որ ավելի վիրավորական է փաստաբանի համար,  քան  կարգապահական տույժի ենթարկվելը»։

   Աղմկահարույց գործերով փաստաբանը շատ հետաքրքիր դեպք հիշեց, երբ ինքը եւ իր գործընկերը դատարանի մեկ որոշումով   ենթարկվել են դատական սանկցիայի՝ դատական նիստին չներկայանալու հիմքով։  Մինչդեռ գործընկերոջ նկատմամբ Փաստաբանների պալատի խորհուրդը  կարգապահական վարույթը կարճել է, իսկ  իր նկատմամբ կիրառել խիստ նկատողություն։

Բոլոր հետապնդումները փաստաբանը  երկու բովանդակային խմբերի է   բաժանում՝ առաջինը՝ դահլիճ լքել եւ երկրորդը՝ չներկայանալ դատական նիստին։ Իսկ  Պալատն  առանց  փաստական հանգամանքներ դիտարկելու, առանց հանգամանքներ հաշվի առնելու, օրինակ՝ արդյո՞ք փաստաբանին ծանուցել են դատական  նիստի մասին, թե՝ ոչ, հնարավորությու՞ն ունեցել է իր եւ իր վստահորդի իրավունքները պաշտպանել, թե՝ ոչ, այդ ստանդարտ մոտեցումներով շարունակել է  փաստաբաններին ենթարկել  կարգապահական տույժերի։

«Հելսինկյան ասոցիացիա» ՀԿ նախագահ Նինա Կարապետյանցը հիշեցնում է՝  դատարանի նկատմամբ անհարգալից վերաբերմունքի համար երբեւէ որեւէ դատախազ պատասխանատվության չի ենթարկվել։ Ավելին՝ դատախազներից մեկը  հայհոյելու համար ստացել է նկատողություն։ Մինչդեռ  փաստաբաներից մեկն իր ՖԲ գրառման համար զրկվել է արտոնագրից։

Սանկցիաներից մեկը թե՛ ԱրայիկՊապիկյանը, եւ թե՛ Նինա Կարապետյանցը ստացել են միայն այն բանի համար, որ  միջնորդել են հետաձգել  նիստը, քանի որ  25 օր հացադուլի մեջ գտնվող իրենց պաշտպանյալն ի վիճակի չի եղել մասնակցել դատական նիստին։  Դատավորը նիստը չի հետաձգել, ինչի պատճառով նրանք ստիպված լքել են դահլիճը։

 Անդրադառնալով դատարանի նկատմամբ անհարգալից վերաբերմունքի համար մինչեւ 100 հազար դրամ տուգանքին՝   Նինա Կարապետյանցը նշեց,  որ իրավապաշտպան-փաստաբանները, ինչպես նաեւ Հանրային պաշտպանի գրասենյակի փաստաբանները կաշկանդվելու են, քանի որ ցանկացած խոսք կարող է հանգեցնել տուգանքի։ Մինչդեռ մասնավոր կերպով ինչ-որ մեկի շահերը ներկայացնող փաստաբանները հանգիստ կարող են խոսել․ ֆինանսական ապահովություն ունեցող վստահորդը կվճարի  այդ տուգանքները։  

   2015-2019թթ․ քննվել է հինգ քրեական գործ՝ փաստաբանի մասնագիտական գործունեությունը խոչընդոտելու դեպքով։ Այս տվյալները «Հելսինկյան ասոցիացիա»-ն ստացել է հարցման արդյունքում։

   Կլոր սեղան-քննարկման ժամանակ փաստաբան Արա Ղարագյոզյանը տեղեկացրեց նաեւ, որ ըստ հարցման արդյունքների՝  երեք քրեական գործի վարույթ կարճվել է, մեկ քրեական գործ միացվել է այլ քրեական գործի վարույթի, իսկ մեկ քրեական գործով նախաքննությունը շարունակվում է։

Հարցումներ են ուղարկվել Գլխավոր դատախազություն, ՄԻՊ, Դատական դեպարտամենտ, ՀՔԾ,  Քննչական կոմիտե եւ  Փաստաբանների պալատ։  Բոլոր կառույցները պատասխանել են հարցումներին, բացի Գլխավոր դատախազությունից։  Չորս տարիների ընթացքում ՄԻՊ աշխատակազմի թեժ գծին ստացվել է  107 բողոք՝ փաստաբանի մասնագիտական գործունեությունը խոչընդոտելու փաստով։ Պաշտպանի միջամտությամբ  2015թ․ լուծում է ստացել  7,  2016 եւ  2017թթ․՝  14, իսկ  2018թ․՝ 37 բողոք։

Ներկաները հարց բարձրացրին, թե ինչ խնդիրներ կան  հիմա՝ հեղափոխությունից հետո։

   Փաստաբան  Արա Ղարագյոզյանը հույս  է ունեցել, որ  հեղափոխությունից  փաստաբանի մասնագիտական գործունեությունը խոչընդոտելու փաստով կասեցված քրեական գործերը կվերաբացվեն, եւ պաշտոնատար անձինք կենթարկվեն պատասխանատվության։ Նա միաժամանակ ցավով ընդգծում է, որ փաստաբանները նույնացվում են իրենց պաշտպանյալների հետ։  «Թե՛ Մանվել Գրիգորյանի եւ թե՛ Ռոբերտ Քոչարյանի պաշտպանները սպառնալիքների եւ հայհոյանքների են ենթարկվում միայն նրանց պաշտպանելու համար։  Քրեական գործ չկա հարուցված, եւ փաստաբանները տուժող չեն ճանաչվել։  Փաստաբանները հետապնդվում են ոչ թե  իշխանությունների, այլ հասարակության կողմից։ Պետությունը պետք է պաշտպանի փաստաբանին»,- ասաց Արա Ղարագյոզյանը։

   Իսկ Արայիկ Պապիկյանը հավելեց, որ հետհեղափոխական Հայաստանի Գլխավոր դատախազությունում ոչինչ չի փոխվել։ Վերջինս հանցագործության մասին   հաղորդումներ է ներկայացրել Գլխավոր դատախազություն եւ  ստացել  է  երկու գրություն․ «Նույնիսկ  չեմ ասի, որ ուղղված էր իրավաբանին, ուղղված էր չորսամյա կրթությամբ ինչ- որ անձի։ Ոչինչ չի փոխվել, վերաբերմունքը մնացել է նույնը։ 2017թ․  հնչեցված  սպառնալիքների փաստով տուժող եմ  ճանաչվել։ 6-րդ  վարչությունում պարզեցին, թե ով էր սպառնալիքներ հնչեցնողը, անձը պարզ էր, բայց գործը կասեցվեց, եւ հիմա փորձում են գտնել օգտատիրոջը»։ Նրա համար տարօրինակ է այն, որ Նիկոլ Փաշինյանի հանձնարարությունից հետո քիչ օրերի ընթացքում գտան ֆեյքերին։ Մինչդեռ հետհեղափոխական Հայաստանում ոչինչ չի արվում իրավապաշտպանության եւ փաստաբանության ինստիտուտների նկատմամբ դրական վերաբերմունքի ձևավորման առումով։

«Դրան պետք է նպաստեն իրավապահ  մարմինների առարկայական գործողությունները։  Երբ հետհայաց նայում  ենք, նախորդ տարիների հետապնդումներն առ այսօր շարունակվում են եւ գնահատականների չեն արժանացել։ Հենց դրանք նպաստեցին Հայկ Ալումյանի, Արսեն Մկրտչյանի նկատմամբ հետապնդումներին»,- ավելացրեց Արայիկ Պապիկյանը։

 «Վելես» իրավապաշտպան ՀԿ նախագահ Մարինա Պողոսյանն էլ ընդգծեց, որ հետհեղափոխական Հայաստանում միակ փոփոխությունը այն է, որ Ծռերի խնդիրը չկա, եւ փաստաբանների կարգապահական վարույթները կրճատվել են։ Իսկ իրավապահ համակարգը միշտ եղել է ինչ-որ մեկի քաղաքական կամքի կամակատարը։ Արդյունքում մենք չունենք դատախազության, ոստիկանության համակարգ։

   Կլոր սեղան-քննարկման ներկա  Հայաստանում Եվրամիության պատվիրակության քաղաքական հարցերով խորհրդական Անդրեա Խալուպովան  ընդգծեց, որ  կառավարությունը պետք է որ չմիջամտի արդարադատությանը։ Բայց նաեւ հարց բարձրացրեց՝ քրեական նախկին գործերով արդյունքներ չունենալը որքանո՞վ է կապված դատավորների ծանրաբեռնվածության հետ։

Արայիկ Պապիկյանը պարզաբանեց, որ բոլոր գործերը, որոնք վերաբերում են փատաբաններին, իրավապաշտպաններին, փաստաբանի մասնագիտական գործունեությունը խոչընդոտելուն կամ սպառնալիքներին, այդ  բոլոր գործերը դեռեւս գտնվում են նախաքննական փուլում՝ Քննչական կոմիտեում կամ Հատուկ քննչական ծառայությունում, չկա ավարտված գործ։ Իսկ Արա Ղարագյոզյանն էլ ավելացրեց՝ պատվեր կատարող եւ քաղաքական որոշում կայացնող   դատավորները շարունակում են պաշտոնավարել․ «Մարտի 1-ի գործով ՄԻԵԴ-ը որոշումներ է կայացնում, սակայն որեւէ տեղաշարժ չկա։ Ապօրինի ակտ կայացրած դատավորը պետք է ենթարկվի քրեական պատասխանատվության։ Նույն Նիկոլ Փաշինյանին յոթ տարվա ազատազրկման դատապարտած դատավորը միտք էլ չունի համակարգը լքելու, եւ նա շարունակում է «արդարադատություն» իրականացնել։ Դատական համակարգում չենք տեսնում իրական փոփոխություններ»։

   Նինա Կարապետյանցը եւս  ցավով է արձանագրում, որ հետհեղափոխական Հայաստանում  արդարադատություն իրականացնող համակարգում իրականում ոչինչ չի փոխվել։ Քանի որ  կասցեված գործերի վերաբացման պարագայում քննիչին, վերահսկող դատախազին, միջանկյալ ակտեր կայացնող դատավորներին պետք է հարց տան՝ ինչու ոչինչ չեն արել,  քրեական պատասխանատվության խնդիրն է բարձրանալու․

«Ընդ որում՝ մեծ թվով  մարդիկ պետք է պատասխանատվության ենթարկվեն, իսկ անպատժելիությունը բերում է ավելի ծանր հետեւանքների։ Ժամանակավոր հանգիստ վիճակն իրականում շատ խաբուսիկ է, իրականում  այդպես չի լինում։ Ցանկանած պարագայում, երբ հնարավորություն լինի վերականգնել իրավիճակը, երբ մեր քննիչները, դատախազները, դատավորները օրենքը խախտելով հնարավարություն կունենան կոռուպցիոն ռիսկերով  որոշումներ կայացնել  ու ըստ պահանջի ապրել եւ հարստանալ, համոզված եղեք, իրենք առաջինն են լինելու հակահեղափոխական ուժերի շարքում։ Իրենց ձեռնտու չէ նվազագույն աշխատավարձով աշխատել, իրենց ձեռնտու չէ, որ կարող են քրեական պատասխանատվության ենթարկվել։ Նախորդ տարվա հեղափոխության տապալվելու ամենամեծ շանսը հենց այս համակարգում կարող է լինել, եթե չլինեն ռեալ փոփոխություններ, գոնե պատասխանատվության պետք է ենթարկվեն այն դատավորները, որոնց կայացրած վճիռներով Եվրոպական դատարանից որոշումներ  ենք ստացել։ Այդ դատավորները շարունակում են մինչեւ այսօր մարդկանց ճակատագրերի հետ խաղալ»։ Նրա համար անհանգստացնող է այն, որ   արդարադատության ոլորոտում փոփոխություն տեղի չի ունենում։ Նրա համար կասկածելի է Նիկոլ Փաշինյանի այն դիտարկումը, թե էվոլյուցիոն ճանապարհով հնարավոր են փոփոխություններ։ Արդարադատության ոլորտում դա հնարավոր չէ՝ համակարգը շահագրգռված չէ։   

«Փաստաբանների իրավունքների ջատագովություն» թեմայով երկրորդ կլոր սեղան հանդիպմանը ներկա էին Երևանում Լեհաստանի Հանրապետության դեսպան Պավել Չեպլակը, Հայաստանում ԱՄՆ-ի, Բրիտանիայի, Շվեյցարիայի դեսպանությունների, ԵԽ-ի, ԵՄ պատվիրակության, Ժողովրդավարության եվրոպական հիմնադրամի, ՀՀ արդարադատության նախարարության, ՀՀ ՄԻՊ աշխատակազմի, իրավապաշտպան կազմակերպությունների, լրատվամիջոցների ներկայացուցիչներ, փաստաբաններ։

  • Տեղադրված .
  • Դիտումներ: 21
0
0
0
s2sdefault
147.JPG
  • Տեղադրված .
  • Դիտումներ: 88
0
0
0
s2sdefault
143.jpg

Իրանում կանանց և աղջիկներին թույլատրված չէ դուրս գալիս տնից, եթե նրանք չեն ծածկում իրենց մազերը գլխաշորով և իրենց ձեռքերն ու ոտքերը՝ ազատ հագուստով։ Իրանում հիջաբ կրելու պարտադիր լինելու դեմ շարժումը սկսվել է 2017թ․-ին, երբ մի կին միայնակ դիմադրության գործողություն իրականացրեց։ Նա հանեց իր գլխաշորը և, ամրացնելով փայտի ծայրին, լուռ թափահարեց այն։ Բազմաթիվ կանայք ամբողջ երկրով մեկ միացան նրան՝ կազմակերպելով բողոքի ակցիաներ։ Նրանք հայտնի դարձան որպես «Հեղափոխական փողոցի աղջիկներ»։

Իրավապաշտպանը բանտարկվել է

2018թ․-ին Նասրինը պաշտպանել է այս կանանցից մի քանիսին, ովքեր ենթարկվել են դատական հետապնդման։ Այժմ երկու խիստ անարդար դատավարությունների արդյունքում Նասրինը դատապարտվել է 38 տարվա ազատազրկման և մտրակի 148 հարվածի՝ մեկուսացված ամուսնուց և երեխաներից։ Կանայք պետք է կարողանան ընտրել, թե ինչ հագուստ կրեն, և իրավաբանները պետք է կարողանան պաշտպանել այդ անելու նրանց իրավունքը։ Սա վերջին տարիներին Իրանում իրավապաշտպանի դեմ արձանագրված ամենասարսափելի դատավճիռն է, որը ենթադրում է, որ իշխանություններն ուժեղացնում են իրենց ճնշումները:

Օգնե՛ք ազատել Նասրինին

Սա առաջին անգամը չէ, որ Նասրինը թիրախավորվում է։ 2010թ․-ին նա դատապարտվել էր վեց տարվա ազատազրկման իրավապաշտպան գործունեության համար։ Բայց երբ Ձեզ նման հազարավոր մարդիկ ոտքի կանգնեցին և պահանջեցին նրա ազատությունը, նա արդարացվեց և ազատ արձակվեց։ Արշավն աշխատեց այն ժամանակ, այն այժմ կարող է կրկին աշխատել Նասրինի համար։

Նասրինն իր կյանքը նվիրել է մարդու իրավունքների պաշտպանությանը։

Կարող եք միանալ արշավին անցնելով հետևյալ հղումով։

Նյութի աղբյուրը՝ Amnesty International UK:

  • Տեղադրված .
  • Դիտումներ: 115
0
0
0
s2sdefault
142.jpg

ՀՀ փաստաբանների պալատի  ներկայացուցիչ Գեւորգ Մկրտչյանը, նախքան իր կարծիքը դատական նիստի ընթացքում տեսանկարահանման մասին հայտնելը, ցանկացավ ճշտել, թե ո՞վ է  տեսանկարահանում անցկացնելու։ Պարզելով, որ «Հելսինկյան ասոցիացիա» իրավապաշտպան հասարակական կազմակերպության նկարահանող խումբն է, առարկեց․ «Առարկում եմ։ Ծանոթ եմ իրենց գործելաոճին, եւ տեսանյութը կարող է յուրովի մեկնաբանվել»,- ասաց Գեւորգ Մկրտչյանը։

Հայցվոր Արայիկ Պապիկյանը Պալատի ներկայացուցչի պատճառաբանությունը չփաստարկված եւ հիմնազուրկ որակեց։

Այսօր դատարանում Արայիկ Պապիկյանը վիճարկում էր Փաստաբանների պալատի նախագահի 10.08.2017թ. թիվ 233-Ա/ԿԳ-17068 և Խորհրդի 05.04.2018թ. թիվ ԿԳ/65-Ա որոշումները։

Դատավոր Դիանա Հովհաննիսյանը  պարզաբանեց, որ  դատական նիստի տեսանյութի բացակայությունը կարող է դատական նիստն այլ կերպ մեկնաբանելու և ներկայացնելու տեղիք տալ, և ընդհակառակը,  տեսանկարահանման եւ նկարահանման դեպքում շատ ավելի հեշտ է խուսափել հնարավոր «յուրովի» մեկնաբանություններից։  

Իր խոսքում նշելով, որ  աշխատում է «Հելսինկյան ասոցիացիա»-ում, Արայիկ Պապիկյանը տեղեկացրեց, որ կազմակերպությունն իրականացնում է ինչպես իր, այնպես էլ այլ փաստաբանների նմանատիպ գործերով դատական նիստերի մշտադիտարկում և տեսանկարահանում դատարաններում։  

Այնուամենայնիվ, Փաստաբանների պալատի ներկայացուցիչը պնդեց իր կարծիքը, և դատավորը, հղում անելով «Քաղաքացիական դատավարության» օրենսգրքին եւ պատասխանող կողմի առարկությանը, ստիպված եղավ արգելել տեսանկարահանում անցկացնելը։

Այս գործով դատական նիստը հետաձգվեց, քանի որ հայցվոր կողմի մոտ հայցի հիմքի փոփոխության անհրաժեշտություն կա։  Դատական նիստը հետաձգվեց մինչեւ ապրիլի 16-ը։

Նույն հիմքով հետաձգվեց նաեւ Փաստաբանների պալատի նախագահի 15.09.2017թ. թիվ 295-Ա/ԿԳ-17111 և խորհրդի 15.03.2018թ. թիվ ԿԳ/51-Ա որոշումներն անվավեր ճանաչելու պահանջի մասին նիստը։

   Պատասխանող կողմի ներկայացուցիչ Գեւորգ Մկրտչյանը առարկեց նաև այս գործով տեսանկարահանման դեմ։  Վերջինս պատճառաբանեց, որ Արայիկ Պապիկյանը «Հելսինկյան ասոցիացիա»-ի աշխատակից է, եւ որ ինքը մտավախություն ունի, որ նիստի ընթացքը կարող է յուրովի մեկնաբանվել։

   Մկրտչյանն առարկեց, մասնավորապես նշելով․«Հարգելի՛ դատարան, դժվար չէ հատվածական մեջբերումներ անել»։ Նա  առաջարկեց մերժել ներկայացված միջնորդությունը։

Արայիկ Պապիկյանը միջնորդեց նախնական դատական նիստը հետաձգել, քանի որ հայցի հիմքում լրացման կարիք կա՝ առանց առարկան փոփոխելու։

Պատասխանող կողմը՝ Գեւորգ Մկրտչյանը, առարկեց միջնորդության դեմ՝ պատճառանաբանելով, որ հայցվոր կողմը բավարար ժամանակ ուներ դրան անդրադառնալու համար։

Դատավոր Դիանա Հովհաննիսյանը պատճառաբանեց, որ եթե կողմը նման միջնորդություն է ներկայացնում, մինչ ապացուցման բեռի բաշխումը, ապա նախագահողը պարտավոր է դատական նիստը հետաձգել։

Հաջորդ նիստի օր նշանակվեց ապրիլի 16-ին։  

   Հ․Գ.
Ի գիտություն ՀՀ փաստաբանների պալատի ներկայացուցիչ Գեւորգ Մկրտչյանի, տեղեկացնում ենք, որ «Հելսինկյան ասոցիացիա»-ի կայքէջում մշտադիտարկման առարկա դատական նիստերի նկարահանումների տեսահոլովակները տեղադրվում են ամբողջությամբ՝ գրեթե առանց մոնտաժի, լիովին պահպանելով բովանդակային մասը։

Համոզվելու համար կարող եք համեմատել «Հելսինկյան ասոցիացիա»-ի www.hrtv.am կայքէջում տեղադրված՝ Պալատի խորհրդի ցանկացած նիստի տեսահոլովակ Խորհրդի համապատասխան նիստի ձայնագրության հետ։ 

Իսկ որպեսզի խուսափեիք Փաստաբանների խորհրդի նիստերի, ըստ Ձեզ, «յուրովի մեկնաբանություններից», կարելի է թույլատրել, օրինակ, դրանք անցկացնել հանրության համար բաց, հասանելի, առանց արհեստական խոչընդոտների, ինչպես դա արվում էր նախկինում։

  • Տեղադրված .
  • Դիտումներ: 1167
0
0
0
s2sdefault
140.jpg

  «Վանաձոր» ՔԿՀ պետը Փաստաբանների պալատից խնդրում է պատասխանատվության ենթարկել  փաստաբան Արայիկ Պապիկյանին զուտ նրա համար, որ վերջինս պահանջել է անհապաղ կատարել դատարանի որոշումը։  

Փետրվարի 27-ին Վերաքննիչ քրեական դատարանը որոշում էր կայացրել իր պաշտպանյալին անհապաղ ազատ արձակելու մասին։ Դատարանից  որոշումը պաշտպանը ուղարկել է  «Վանաձոր» ՔԿՀ, որը մի քանի ժամ չէր կատարվել։

   «Զանգահարեցի «Վանաձոր» ՔԿՀ։ Որպես բողոք նաեւ բավականին կոշտ արտահայտություններով պահանջեցի, որ պաշտպանյալիս անհապաղ ազատ արձակեն, որովհետեւ կար  դատարանի անհապաղ ազատ արձակելու մասին որոշում»,- ասաց Արայիկ Պապիկյանը։

«Վանաձոր» ՔԿՀ պետ Արտակ Հովհաննիսյանը Փաստաբանների պալատ ուղարկված գրության մեջ մեջբերումներ է արել  Արայիկ Պապիկյանի հեռախոսազրույցից։ Նա նշել է, որ  բոլոր նրանք, ովքեր դատարանի որոշումը չեն կատարում, պետք է պատասխանատվության ենթարկվեն։ Պաշտպանը տվել է Արդարադատության նախարար Արտակ Զեյնալյանի, Քրեակատարողական ծառայության պետի, Քրեակատարողական հիմնարկի պետի անունները։

«Ըստ էության, ոչ կոռեկտ եմ ինձ պահել։ Հիմա ցանկանում եմ տեղեկացնել, որ ես բավականին  մեղմ եմ դրանք ասել։ Ես վերահաստատում եմ այդ ամենը, որ բոլոր անձինք, ովքեր դատարանի որոշումը չեն կատարում,  պետք է պատասխանատվության ենթարկվեն»,- նշում է փաստաբանը։ Նա նաև  ավելացնում է․ «Եթե Վանաձոր» ՔԿՀ պետը տեղյակ չէ ՔՕ 353-րդ հոդվածից, ապա ժամանակն է նրան հիշեցնել , որ սեւով սպիտակի վրա նշված է՝ դատական ակտը դիտավորությամբ չկատարելը, որում նշված է կատարման ժամկետ, քրեորեն պատժելի արարք է»։

«Վանաձոր» ՔԿՀ պետը  Փաստաբանների պալատի նախագահին  խնդրել է  է գրությունը ընդունել որպես հաղորդում եւ քննարկել Արայիկ Պապիկյանի նկատմամբ կարգապահական վարույթ հարուցելու նպատակահարմարությունը։

 «Եթե  ես, իր կարծիքով,  էթիկայի կանոններ եմ խախտել, ապա նպատակահարմարության հարց չի քննարկվում։ Սա հայեցողական տիրույթ չպետք է լիներ։ Այսինքն՝ ինքն անգամ կասկածում է՝ Արայիկ Պապիկյանը ինչ-որ բան խախտե՞լ է, թե՝ ոչ»,- ասում է փաստաբանը։

 Արայիկ Պապիկյանն առաջարկում է ՔԿՀ պետի  իրավական գիտելիքները ստուգման ենթարկել Արդարադատության նախարար Արտակ Զեյնալյանի կողմից։

 Իսկ եթե հեռախոսազրույցն էլ ձայնագրվել է, որի մասին  Արայիկ Պապիկյանին տեղյակ չի պահվել, ապա ձայնագրություն կատարող անձը՝ Հայկ Կաչյանը,   թույլ է տվել օրենքի խախտում։

   ՔԿՀ աշխատակիցը  պետք  է պատասխանի՝ ձայնագրե՞լ են հեռախոսազրույցը,  թե ուղղակի խոսակցությունից մեջբերումներ արել։ Արայիկ Պապիկյանը վստահեցնում է՝ իր խոսքերը խեղաթյուրել են։

 «Նշել են՝ փաստաբանը հորդորել է կալանավորված անձի հարազատներին ՔԿՀ հիմնարկ չներկայացնել  որոշման պատճենը։ Սա ուղղակի ֆանտաստիկ երեւակայություն ունեցող անձը կարող է նման գործողություններ թույլ տալ»։ Այս ամենը, ըստ պաշտպանի, վկայում է այն մասին, որ պաշտոնյաների կողմից  ՔԿՀ-ներում  շարունակում են տիրել այն բարքերը, որոնք եղել են Սերժ Սարգսյանի, Ռոբերտ Քոչարյանի օրոք, եւ փոփոխություներ դեռ չեն երեւում։

 Այլ մանրամասների կարող եք ծանոթանալ տեսանյութում։

  • Տեղադրված .
  • Դիտումներ: 273
0
0
0
s2sdefault
logoUSAIDlogo23logo

“Սույն վեբ-կայքի ստեղծումը հնարավոր է դարձել իրականացնել Քաունթերփարթ ինթերնեշնլի հայաստանյան ներկայացուցչության կողմից իրականացվող Քաղաքացիական հասարակության և տեղական ինքնակառավարման աջակցության ծրագրի,  և Ամերիկայի Միացյալ Նահանգների բնակչության առատաձեռն աջակցության շնորհիվ` ԱՄՆ Միջազգային զարգացման գործակալության պայմանագրի շրջանակներում “Հելսինկյան Ասոցիացիայի” միջոցով: Սույնի բովանդակությունը, արտահայտված տեսակետերը և կարծիքները պատկանում են հեղինակին` “Հելսինկյան Ասոցիացիային” և հնարավոր է, որ չհամընկնեն Քաունթերփարթ ինթերնեշնլի հայաստանյան ներկայացուցչության, ԱՄՆ Միջազգային զարգացման գործակալության և ԱՄՆ կառավարության տեսակետերի հետ:”

Designed by Hakob Jaghatspanyan Copyright © 2013 Helsinki Association